வீட்டு உரிமையாளர்கள் மற்றும் வாடகைக்கு குடியிருப்பவர்கள் கண்டிப்பாக தெரிந்து வைத்திருக்க வேண்டிய சட்ட விதிமுறைகள் குறித்து பார்க்கலாம்.
வாடகை வீட்டில் குடியிருப்பவர் கொடுக்கும் வாடகை பணத்துக்கு உரிமையாளர் கண்டிப்பாக ரசீது கொடுக்க வேண்டும் என சொல்கிறது தமிழ்நாடு அரசின் சட்டம்.
ரசீது கொடுக்காவிட்டால் குடியிருப்பவர் ஆன்லைன் அதாவது கூகுள்பே, போன்பே, அக்கவுண்ட் டிரான்ஸ்க்ஷன் மூலமாக வாடகை பணத்தைக் கொடுக்கலாம்.
சட்ட விதிமுறைகள்:
வாடகைக்கு குடியிருப்பவரின் வீட்டுக்குள் ஏதாவது ஒரு காரணத்துக்காக உரிமையாளர் போக வேண்டும் என நினைத்தால், 24 மணி நேரத்துக்கு முன்பாக தெரிவிக்க வேண்டும். காலை 7 மணிக்கு முன்பாகவோ, இரவு 8 மணிக்கு பிறகோ வீட்டுக்குள் செல்லக்கூடாது.
வீட்டு வாடகை அக்ரீமண்ட் முடியப் போகிறது எனில், மூன்று மாதங்களுக்கு முன்பே வீட்டின் உரிமையாளரும், வாடகைக்கு இருப்பவரும் ஒன்றாக அமர்ந்து பேசி, அக்ரீமண்ட் போட்டுக்கொள்ள வேண்டும்.
ஆனால், அக்ரீமண்ட் முடிந்தும் எந்த ஒரு அக்ரீமண்ட்டும் போடவில்லை எனில், வாடகைக்கு குடியிருப்பவர் தொடர்ந்து 6 மாதம் அந்த வீட்டில் இருக்கலாம். இருந்தாலும் உரிமையாளர் வீட்டைக் காலி செய்ய சொன்னால் குடியிருப்பவர் கட்டாயம் காலி செய்தே ஆக வேண்டும்.
வாடகை அக்ரீமண்ட்டில் கையெழுத்துப் போட்டவர் துரதிர்ஷ்டவசமாக இறந்துபோகும் சமயத்தில், அக்ரீமண்ட்டில் குறிப்பிட்டுள்ள உறவினர்கள் யாராவது இருந்தால் அவர்கள் ஒப்பந்தம் முடியும் வரை அந்த வீட்டில் வசிக்க முடியும்.
வீட்டை காலி செய்யவில்லை என்றால் என்ன செய்வது?
அக்ரீமண்ட் முடிந்த பிறகுதான் ஒருவரை வீட்டிலிருந்து காலி பண்ண சொல்ல முடியும். அப்படி அக்ரீமண்ட் முடிந்த பிறகும் குடியிருப்பவர் வீட்டைவிட்டு காலி பண்ணவில்லையென்றால் நீதிமன்றத்தை நாடலாம்.
நீதிமன்றம் சொல்லியும் குடியிருப்பவர் வீட்டைக் காலி செய்யவில்லை எனில், அக்ரீமண்ட் முடிந்த தேதியிலிருந்து வீட்டைக் காலி பண்ணும் தேதி வரைக்கும் இரண்டு மடங்கு வாடகை வசூலிக்கலாம்.
அக்ரீமண்ட் எவ்வளவு முக்கியம்:
எல்லா உரிமைகளும் கிடைக்க வேண்டுமென்றால் வாடகை அக்ரீமண்ட் போட்டு ரிஜிஸ்டர் செய்திருந்தால் மட்டுமே உரிமைகள் எல்லாம் கிடைக்கும்.
இந்த சட்டங்கள் எந்த இடத்துக்கெல்லாம் பொருந்தாது?
அரசு நிலங்கள், கோயில் இடங்கள், நிறுவனத்தின் ஊழியருக்கு வாடகைக்கு கொடுக்கப்பட்ட இடங்கள் மாற்றும் ஹோட்டல், லாட்ஜ்க்கு இந்தச் சட்டம் பொருந்தாது.
